PRO-7 gidayeg ni PNoy
CEBU, Philippines – Usa ka pasidungog ang nadawat sa Police Regional Office-7 nga gihatag gikan sa pangulo sa nasud, Presidente Benigno “Noynoy” Aquino III isip mao’y labing maayo nga buhatan rehiyonal nga kapulisan lukop nasud sa kampanya kontra sa mga organisadong kriminal.
Ang maong pasidungog gitawag nga “Best PRO Campaign Against Organized Group” atol sa ika 114 nga Police Service Anniversary nga gipahigayon sa ulohang buhatan sa kapulisan.
Partikular nga gidayeg sa kadagkoan sa PNP mao ang hugot nga kampanya sa kapulisan kontra drugas ug mga ilegal nga armas.
Sa datos nga gipakita sa kapulisan niadtong Enero hangtod Hunyo ning tuiga miabot og 1,541 ka mga drug operations ang nahimo sa kapulisan diin miabot sa 2, 118 ka mga tawo ang nasikop , 2, 560 ka mga kaso ang napasaka ug moabot sa kapin P96 milyones nga kantidad sa shabu ang ilang nasakmit.
Samtang sa kampanya batok ilegal nga armas sa parehos nga panahon kapin 500 ka mga tawo ang nasikop, kapin 800 ka mga ilegal nga armas ang nasakmit ug 496 ka mga kaso ang napasaka. Tungod sa kalampusan sa PRO-7, ang direktor sa PRO-7, Chief Superintendent Prudencio Bañas mipahibalo nga mohatag kini og pasidungog sa iyang mga sakop nga nakatampo sa maong kalampusan. – /EIM) (BANAT NEWS)
- Latest
