Giunay sa bayaw
CEBU, Philippines – Natusaktusak sa bala ang lawas sa usa ka 37-anyos nga lalaki atubangan sa iyang kapuyo human sila gisulong ug gipamusil sud sa ilang balay sa Sitio Cabulacan, Brgy. Banawa ning dakbayan sa Sugbo.
Ang namatay naila nga si Norman Paner, construction worker, samtang naangol ‘sab ang iyang kapuyo nga si Cynthia Caballes, 33.
Gipangita pa karon ang suspek nga manghod ni Caballes nga si Camelo, 25, nga usa ‘sab ka construction worker.
Matud pa ni Senior Police Officer 4 Alex Dacua, imbestigador sa Homicide Section sa Cebu City Police Office nga nahinabi sa Banat News personal nga bikil ang hinungdan sa maong pagpamusil.
Si Dacua miingon nga una’ng nagkaaway si Norman ug Camelo, pipila ka adlaw na ang nakalabay.
Apan bisan giunsa nila sa pagpangutana si Cynthia kung unsa ang giawayan sa duha wala g’yud kini mikooperar kanila.
Matud pa walay daghang estorya gipusil sa suspetsado si Norman sa nagkadaiyang bahin sa iyang lawas. Ug giapil niini pagpusil ang bukton sa maguwang nga babaye dihang misuway kini pagbabag kaniya.
Ang mga biktima gidala sa Cebu City Medical Center (CCMC) apan nakabsan gayod sa kinabuhi si Norman.
Tulo ka basiyo sa kalibre 45 nga pistola ang nakuha sa kapulisan gikan sa crime scene. – /EIM) (BANAT NEWS)
- Latest
