CEBU, Philippines – Nalandig sa tambalanan ang 56-anyos nga construction worker human gipamusil sa silingan nga nasuko ug nipasangil nga nagpasinsilyo og peke nga kwarta.
Ang insidente nahitabo samtang paingon pauli sa ila’ng balay ang biktima nga si Baltazar Villacencio sa sitio Latawan, barangay Sinsin, dakbayan sa Sugbo pasado alas 8 sa nakalabay nga gabii.
Lakip sa nalandig sa tambalanan ang napagan sa pagpamusil nga si Nestor Tabay, 46, kinsa silingan usab sa biktima sa barangay Bagacay, dakbayan sa Toledo samtang ang suspek naila lang sa ngalan nga Dindo.
Matud ni Senior Police Officer 2 Rommel Bancog, imbestigador sa homicide section sa Cebu City Police Office, nga nahinabi sa Banat News nga ang duha ka biktima nagtrabaho sa gitukod nga mall sa SRP.
Sakay sa habal-habal ang mga biktima paingon sa Toledo apan pag-abot sa mao’ng lugar nihunong kay may problema sa suga.
Kalit lang niabot sa lugar ang usa ka motorsiklo nga gisakyan sa suspek ug gipusil ang mga biktima.
Upat ka igo sa lawas ang naangkon ni Villacencio ug igo sa tiil ang naangkon ni Tabay hinungdan sa pagkalandig sa Vicente Sotto Memorial Medical Center (VSMMC).
Ang anak ni Villacencio nga nahinabi sa kapolisan nitug-an nga nasuko sa iya’ng amahan si Dindo kay nipasangil kini nga nakasinsilyo og peke nga P100 pipila na ka adlaw ang nakalabay.
Ang anak hugtanon nga nihimakak sa pasangil. – /GMR) (BANAT NEWS)