Tighimo’g cake apektado sa COA report

CEBU, Philippines - Hayan mawagtangan sa panginabuhi ang Lapu-Lapu City Livelihood and Resource Center ug Kababayen-an sa Opon Nga Nagkahiusa Alang sa Kalamboan (KONKA) nga mao’y tighimo sa cake nga gipanghatag sa birthday sa mga senior citizens.

Kini human nimando ang Commission on Audit sa pagpahunong sa paggasto sa pundo sa siyudad alang sa mao’ng katuyuan.

Matud sa pangulo sa KONKA, Jimmy Glomar, nga gawas nga makalipay sa mga senior citizens, nakatabang ang programa sa panginabuhi sa ila’ng mga sakop. Apan ang COA niingon nga ang programa usa ka "unnecessary expenditure."

Matud ni Glomar, ang cake tag P350 ug tres porsiyento moadto sa  kapunungan ug gamiton isip ila’ng kapital. Si Mayor Paz Radaza nagkanayun nga ang paghatag og cake matag tuig paagi kini sa pagpahibawo sa mga senior citizens nga kanunay sila’ng gihinumduman sa gobiyerno.

Moabot sa kapin sa 16,000 ka senior citizens ang narehistro sa dakbayan sa Lapu-Lapu.

Ang pagpanghatag og cake nalatid sa Senior Citizen’s Handbook sa siyudad nga giaprobahan sa konseho niadtong 2010 ug nasugdan pag-implementar niadtong 2011.

Si Blesila Bacongga, 45, usa sa mga tighimo og cake ug sakop sa Gun-ob Kababayen- an Producers Club nga may 50 ka miyembro, niingon nga sa usa ka cake, adunay makuha nga P25 isip labor ang matag empleyado ug kini tungaon sa mga nitrabaho nga kawani sa GKPC matag adlaw.

Sama kagahapon, ang GKPC adunay order nga 98 ka cakes ug lima ka miyembro ang nihimo nga makakuha og P490 inig human sa adlaw.

Si Epifanio Ycong, 66, bise presidente sa Senior Citizens Gun-ob Chapter ug si Erlinda Villanueva, 69, niingon nga gusto gyud nila nga ipadayun ang programa. (Christell Fatima M. Tudtud ug  Decemay P. Padilla/GMR)(BANAT NEWS)