‘Police asset’ napusilan

CEBU, Philippines - Usa ka gikatahong police asset ang gipusil ug gihapsan sa ulo samtang kini giingong nagpahigayon og imbestigasyon sa Brgy. Looc sa dakbayan sa Lapu-Lapu kagahapon sa kaadlawon.

Matud ni Police Officer 2 Joseph Rouel Cutanda, imbestigador sa Lapu-Lapu City Police Office- Homicide Section ang biktima mao si Wilfredo Naval, 31, taga PC Hills, Brgy. Lahug, Cebu City.

Si Naval gidala sa Vicente Sotto Memorial Medical Center human nakaangkon og samad sa ulo ug samad pinusilan sa walang tuhod.

Wa mobutyag si Cutanda kun asa nga police unit nasakop si Naval, apan gikatahong duna kini  gi-follow-up sa maong barangay kuyog ang duha ka higala nga nailhan lang sa pangan nga  "Tumakay" ug "Icli."

Matud pa kalit nga dunay duha ka wala mailhing mga  lalaki ang nangabot ug gipusil si Naval, samtang nisibat  iyang mga kauban.

Ang usa sa mga suspetsado ang nihapak sa ulo sa biktima gamit ang magahi nga butang hinungdan sa pagkahagba niini sa yuta ug pagkahuman nanibat palayo sa dapit.

Pagkataud-taod nibalik ang mga kauban ni Naval ug gidala kini sa tambalanan.Ang kapolisan padayon pa sa ilang imbestigasyon sa maong hitabo.  (BANAT NEWS)