‘Kano nakigpuyo’g bata

CEBU, Philippines - Usa ka Amerikano ang gidakop tungod kay nakig-ipon kini og 17- anyos nga bata diha mismo sa ilang balay diha sa Brgy. Simala sa Sibonga samtang iyang asawang Filipina atoa karon sa Amerika.

Pasado alas 4 niadtong nakalabay nga hapon gisikop sa kapulisan si Daniel Allan Nielsen, 72, dugay nang nagpuyo sa maong dapit ug giluwas ang 17 anyos nga bata.

Matud pa ni Senior Inspector Rolando Antipolo, hepe sa Sibonga Police nga nahinabi sa Banat News ilang nahibaw-an sa imbestigasyon nga duna g’yuy relasyon ang langyaw ug ang 17 anyos nga nagpuyo ra ‘sab sa maong barangay.

Si Antipolo miingon nga dunay mipadangat kanila og reklamo bahin sa relasyon sa duha. Nasuta usab nga duna nay guna ang relasyon sa suspek ug sa iyang asawa.

Apan si Nielsen nga nahinabi ni Antipolo miinsister nga katabang lamang nila sa balay ang 17 anyos. Ang dalagita matud pa sa langyaw gipaangkan ug naluoy siya niini dihang nagsabak pa maong iyaha kining gitabangan hangtud nagkaanak.

“Naluoy lang daw siya sa babaye kay wala lagi daw bana, wala’y pangpalit og gatas, diaper, unya mas mapinanggaon daw sa iyaha ang 17 anyos nga wala nahatag sa iyang asawa,” matud pa ni Antipolo.

Apan bisan pa man sa pamahayag sa langyaw, gisikop ug gibalhog gihapon kini sa prisohan gumikan kay supak sa balaod ang iyang gihimo.

 “So far wala ni siya’y record diri sa police station, buotan g’yud daw ni siya. Pero leksyon ni sa uban ang nahitabo niya nga dakong bawal sa balaod nato, wa ta’y mahimo naa man ta’y balaod nga sundon,” sigun pa ni Antipolo.

Kaso’ng child trafficking ang gipasaka sa kapulisan batok sa langyaw. (BANAT NEWS)