Mga ginikanan sa mga tinun-an nireklamo

CEBU, Philippines – Mga ginikanan sa mga tinun-an sa Grades 1 ug 2 sa Cebu City Central School nireklamo  tungod sa kabalaka sa sitwasyon sa ilang mga anak human ang mga nasunogan sa P. Del Rosario Extension sa Sitio Kabulihan sa Brgy. Sambag 1 anha temporaryong gipasilong sa katorse nila ka mga lawak.

Tungod niini, 630 ka  tinun-an ang nagklase sa gawas nga gitabunan lang og trapal.

Matud ni Violeta Manubay, nabalaka sila kung mokalit og uwan tungod kay tolda lamang maoy gihimong lawak-saringan sa mga bata,  nabalaka usab sila kay duol kaayo ang tolda sa gate kay basin mogawas ang mga bata.

Naguol usab kining di makatutok sa klase ang mga bata tungod sa kasaba sa palibot ug naguol sila kay eksaminasyon na sa mga tinun-an sunod semana.

Samtang si Buenvenida Portalesa, kansang apo pugos nga mieskuyla bisan gihilantan tungod sa umaabot nilang eksaminasyon nabalaka karon sa iyang apo tungod sa kagrabe sa kainit sa panahon.

"Naluoy ko sa akong mga estudyante kay balisa kaayo tungod sa grabe nga kainit ug walay kahoy nga makasambong namo," matud pa ni Rosalita Pepino, magtutudlo sa Grade One, kinsa nagpurong sa iyang ulo samtang nagtudlo.

Sa pakighinabi sa Banat News kang Lyra Illaga, prinsipal sa maong tunghaan  siya miingon nga niadto pang Lunes sa gabii nabalhin ang mga biktima sa sunog sa ilang tunghaan subay sa mando ni Cebu City Mayor Michael Rama.

Matud ni Illaga,  mihangyo siya nga ang mga bata anha magklase sa classrooms ug mopuli lang ang evacuees kun mamuhi na ang mga bata apan wala sila tugoti.

Si Kapitan Lemar Alcover mibutyag sa Banat News nga gipaubos na nila sa state of calamity ang lugar nga nasunogan ug mipagawas sa ilang calamity fund nga P126 mil aron ipamalit sa pagkaon sa mga biktima.

Adunay 298 ka mga indibidwal ang anaa karon sa maong eskuylahan. – /EIM) (BANAT NEWS)