CEBU, Philippines – Mohatag ang tagdumala sa Cebu Provincial Detention and Rehabilitation Center og ganti sa makatudlo sa nahimutangan sa priso nga naka-eskapo niadto’ng Sabado sa kaadlawon.
Nailhan ang piniriso nga si Michael dela Rosa, 35, taga Balamban, kinsa gituohang nikatkat sa koral sa prisohan atol sa pag-ikyas.
Wala pa hinuon gibutyag ni Marco Toral, ang jail management consultant sa Kapitolyo, ang kantidad sa ganti nga matud gikan sa iya’ng bulsa.
Nakig-alayon na ang tagdumala sa prisohan sa kapolisan aron sa pagpakatap sa hulagway ni dela Rosa.
Gibutyag usab ni Toral nga iya’ng nahinabi si dela Rosa sa cellphone diha’ng nibisita siya sa pamilya sa priso apan nagdumili gyud nga mo-surrender.
“Ingon siya nga huna-hunaon sa daw niya makadaghan,” matud ni Toral nga nahinabi sa Banay News.
Dugang ni Toral nga sigun ni dela Rosa nga nabuhat niya ang pag-ikyas tungod sa kabalaka sa iya’ng pamilya ug lima ka anak nga wala na ka-eskwela.
“Nabalaka pud daw siya nga basin daw nga di na siya kalaya ug kung mobalik siya, basin unya daw og kulatahon,” matud ni Toral.
Giseguro hinuon ni Toral nga dili pahilabtan si dela Rosa kun kini mobalik sa prisohan.
“Pwede pa gani mi motabang sa iya’ng pamilya kay luoy gyud pud kaayo, wa intawn kuryente pagbisita namo,” si Toral nagkanayun. – /GMR) (BANAT NEWS)