Duha ka batang gipurga naospital

CEBU, Philippines - Duha ka estudyante sa habagatang bahin sa Sugbo ang giingong nagsige og suka ug nagsakit ang tiyan human gipurga niadtong adlaw’ng Miyerkules.

Gibutyag sa Provincial Health Office nga gidala sa Oslob District Hospital ug Minglanilla District Hospital ang mga bata tungod sa ilang gipamati.

Hinuon, matud ni Cynthia Genosolango, hepe sa PHO, nga miarang na ang kahimtang sa duha ka bata ug gipapauli na sa ilang mga panimalay.

Matud niya nga wala pa siya nakadawat og feedback gikan sa mga lokal nga otoridad mahitungod sa hinungdan sa maong pagsuka ug sakit sa tiyan.

Si Genosolango nagkanayon nga posibleng side effects lang sa tambal ang nasinati sa mga bata. Ang maong tambal pamurga gihatag gikan sa Department of Health alang sa deworming program niini.

Siya usab nagkanayon nga mahimong dunay “untoward reactions” sa usa ka tawo ang tambal pamurga ilabi na kun kini way kaon.

Gitambagan niya ang mga ginikanan nga dad-on dayon sa duol nga tambalanan ang ilang mga anak kun makasinati sa mga side effects sa bisan unsang matang sa mga tambal. (BANAT NEWS)