Siyudad gikiha sa Citilink
CEBU, Philippines - Gipasakaan og kasong sibil sa One Citilink Terminal Inc. nga girepresentahan ni Felipe Code Ra Barrientos, Jr., ang siyudad sa Sugbu aron mahunong ang pagpasirado sa maong terminal.
Matud pa sa ilang abogado nga si Ralph Sevilla gilapas ni Mayor Michael Rama ang due process of law ug ang pagpagawas sa mayor og closure order usa ka abuse of authority.
Ang closure order gipirmahan ni Rama niadtong Hulyo 27, 2015 tungod kay nag-operate ang maong terminal nga way final mayor’s permit ug wala kini makabayad sa buhis niini sa siyudad nga miabot na og P12.8 milyones.
Matud sa kihante dili ang mayor kondili ang Konseho ang dunay hurisdiksyon sa PUJ/V-Hire Accreditation Committee.
Midugang si Sevilla nga ang wa pagbaton og final mayor’s business permit dili basihan pasirad-an ang terminal kay wala man gibutang nga ang ilang gikuptang mayor’s permit temporary pa.
Samtang bahin sa P12.8 milyones nga balayrunon sa terminal, naresolba na atol sa imbestigasyon sa Accreditation Committee sa konseho niadtong Enero 29, 2014.
Gawas sa TRO, nangayo usab sila’g injunction to stop permanently the city government from closing the Citilink terminal ug danyos nga P120,000 isip actual damages ug P53,000 sa attorney’s fees. (BANAT NEWS)
- Latest
