CEBU, Philippines - Nagtingkagol karon sa Minglanilla Police Station ang usa ka maestra sa elementarya human kini gipasanginlan nga nanghapak sa ulo sa iyang estudiyante gamit ang door knob sulod sa iyang lawak saringan pasado alas 4 sa nakalabay nga hapon sa Calajoan Elementary School sa maong lungsod sa Minglanilla.
Ang maestra giila nga si Rossan Sellote, 31, maestra sa grade 4 ug nagpuyo sa maong barangay, samtang ang bata nag-edad og 9 anyos, lalaki taga Lower Calajoan sa maong lungsod.
Matud pa ni Police Officer 2 Marry Christie Nacario ang in-charge sa Women’s and Children Protection Desk sa Minglanilla Police nga nahinabi sa Banat News nga ang bata mialegar nga gihapak siya sa maong magtutudlo katulo ka higayon diha sa ulo.
Sumala pa ni Nacario gihapak ang bata og door knob human nga nakakita og away sa iyang classmate.
Apan tungod sa kakusog sa paghapak nakuyapan ang bata sulod sa classroom. Ang iyaan sa bata nga mao’y tigkuha niini sa eskuylahan nakabantay nga nagkadugo ang ulo sa iyang pag-umangkon.
“Ingon ang bata nga katulo daw siya gihapak sa maestra, sila’ng duha daw sa iyang nakaaway pero murag siya ang nagrabehan kay nagkadugo man g’yud ang ulo sa bata,” matud pa ni Nacario.
Pasado alas 8 sa nakalabay nga gabie miadto sa buhatan sa kapulisan ang ginikanan sa bata aron pormal nga mopasaka og reklamo batok sa magtutudlo.
Ang maestra nga nahinabi ni Nacario milimod sa pasangil nga iyang gihapak ang ulo sa bata kay igo lang niya gitukmod ang bata aron malayo sa iyang nakaaway.
Apan ang ginikanan sa bata nagdala og medical report nga nagpakita nga dunay samad ug bun-og ang ulo sa ilang anak.
Kaso’ng child abuse ang giatubang sa maong maestra nga nagtingkagol karon sa presinto sa kapulisan nga aduna’y P80 mil nga piyansa. (BANAT NEWS)