CEBU, Philippines - Temporaryo nga ibalhin ang terminal sa mga V-Hires gikan sa Tabo-an nganha sa bodega sa Prince Ware House sa may Campaña Maritima sa dakbayan sa Sugbo.
Kini subay sa plano sa siyudad nga wa nay terminal nga ibutang sa sulod sa dakbayan. Padayon karong gisusi kun asa mabalhin ang permanente nilang terminal.
Matud ni City Administrator Lucelle Mercado buot ni Mayor Michael Rama nga ang mga sakyanan nga igo rang maghatud og pasahero way rason aron maglaroy-laroy sa siyudad.
Ang mga V-Hires nga mobiyahe paingon sa Badian, Toledo, ug Sibonga anha ibutang sa bakanteng luna sa Devotees City, apan sa pagkakaron anha lang una sila sa Taboan.
Samtang ang mga V-Hires nga mobiyahe paingon sa Balamban ibutang sa North Bus Terminal.
Ang rason ngano ibalhin ang V-Hires nganha sa Devotee City tungod kay magkaproblema pud unya ang trapiko sa Taboan tungod kay abutanan man kini sa mga turista.
Si Acting Executive Director sa Citom Atty. Rey Gealon nipadangat og suwat kang Barangay San Nicolas Proper Kapitan Abraham Desamparado ug Station 6 OIC Police Inspector Alejandro Lopez sa pagbutang og polis ug tanod sa Taboan aron mag-monitor sa parking lot kun diin temporaryo karong gibutangan sa mga V-Hires nga adunay rota nga Lutopan, Toledo ug Balamban.
Giklaro ni Gealon, way legal nga obligasyon ang siyudad nga kinahanglang mohatag og terminal sa mga V-Hires, apan duna kini legal nga obligasyon aron sulbaron ang problema sa trapiko ug kaluwasan sa mga pasahero. (BANAT NEWS)