CEBU, Philippines – Pormal na’ng gibuksan ang “prison motel” sulod sa Cebu Provincial Detention and Rehabilitation Center niadto’ng Sabado alang sa mga magtiayun nga gusto’ng mopahimulos og pribado nga panahon sa ila’ng kapikas.
Gihimo’ng 18 ka kwarto ang kanhi gibutangan sa mga masakiton nga priso sa CPDRC ug ang mga priso anaa na karon sa infirmary.
Tag P20 ngadto sa P30 ang bayad matag oras depende sa kwarto nga gamiton sa mga magtiayun.
Matud ni Lito Granada, usa sa mga mayor de mayores sa CPDRC, nga namugna ang mao’ng pamaagi sa ila’ng kooperatiba human daghan sa mga priso nga magtiayun ang mauwaw sa ila’ng kubol-kubol ug dunay uban sabaan.
Sumala pa ni Granada ang una nila’ng kita niadto’ng adlaw nga Sabado niabot og P2 mil apan gamiton kini nila pagpamalit og mga pintal, plywood ug uban pa aron magamit sa pagpanindot sa mga kwarto.
Dugang ni Granada ang mga magtiayun mahimo ra modala sa ila’ng mga anak sa pagkatulog sa kwarto.
Ang consultant sa CPDRC, Marko Toral, nibutyag nga bugtong mga magtiayun nga makapakita og marriage certificate ug certification gikan sa ila’ng barangay nga magtiayun gyud sila ang mosulod sa kwarto.
Usa ka priso nga nahinabi sa Banat News nipadayag nga daku kaayo og tabang kanila’ng mga minyo nga adunay klaro’ng privacy sa higayun nga mobisita ang ila’ng kapikas tungod kay adunay uban kanila nga mobati gyud og kahinam ilabi na kung dugay sila wa magkita. – /GMR) (BANAT NEWS)