‘100 Millionth baby’ nag-birthday
CEBU, Philippines – Gikalipay sa usa ka inahan nga si Julie Mae Berenguel nga ang iya’ng anak nga si Paul James Gregory Entis ang usa sa mga bata nga kwalipikado sa “Search for the Country’s 100 Millionth Baby” sa niagi’ng tuig.
Gawas kang Entis, laing kwalipikado gikan sa Sugbo si Kyle Olendang apan wala kini nakatambong sa 1st Birthday of the Symbolic 100 Millionth Baby kagahapon nga gipasiugdahan sa Commission on Population, Department of Health, National Nutrition Council ug PhilHealth.
Matud ni Berenguel nga daku kaayo ang iya’ng pasalamat nga gihatagan sila og birthday celebration sa iya’ng anak ug nakadawat usab siya og kagamitan sa iya’ng anak lakip sa lifetime coverage sa PhilHealth.
Sumala pa ni Berenguel nga daku na og tabang sa iya’ng anak ang nadawat nga mga regalo ug kanunay usab maka-avail sa serbisyo sa kagamhanan.
Si Atty. Bruce Ragas, director sa PopCom-7, nibutyag nga tanang naangkon nga kahigayunan ni Entis maangkon usab sa tanang kabataan sama sa access sa tanang health ug education services.
Matud ni Ragas nga padayun ang ila’ng monitoring kung nakaangkon ba sa tukma nga serbisyo gikan sa kagamhanan si Entis tungod kay kini nagsimbolo nga kung siya naserbisyuhan, wala’y rason nga ang mga ordinaryo’ng kabataan dili makaangkon sa susama nga serbisyo sa kagamhanan. – /GMR) (BANAT NEWS)
- Latest
