Simbahan nihinabang sa nasunugan

CEBU, Philippines – Nakadawat og hinabang gikan sa simbahan ang 157 ka pamilya sa sitio Tugas, Delos Reyes ug Mangga sa barangay Mambaling nga nasunugan.

Ang Archdiocesan Shrine of San Roque Mambaling nga gipangulohan ni Jonas Artiaga, presidente sa Chapel Federation sa simbahan, nipahigayon og feeding ngadto sa mga nasunugan.

Matud ni Artiaga nga nangayo sila og donasyon sa mga higala, mga organization sa simbahan ug mga residente sa Mambaling nga andam nipaambit sa ila’ng mga grasya ngadto sa mga nabiktima sa sunog. Nanghatag usab sila og putos nga may sulod bugas, de lata, noodles ug otap ug lakip ang pipila ka mga senina.

Mapasalamaton si Artiaga sa tanan nga nitabang ug sa pagpaluyo sa kura paruko nga si Rev. Fr. Miguelito Sarmago.

Nitambong sa kalihukan ang mga sakop sa San Roque Parish Youth Coordinating Council, Knights of Columbus ug pipila ka sakop sa simbahan nga nipahapsay sa pagpangapod-apod sa mga hinabang. – /GMR) (BANAT NEWS)