CEBU, Philippines - Nahimutang sa Low Pressure Area ang Metro Cebu hinungdan nga nasinati ang kalit nga mga pag-uwan inubanan sa dugdog ug kilat.
Matud ni Engr. Oscar Tabada, PAGASA-Visayas director, ang LPA nahimutang 115 kilometers East sa Kasiguran, Aurora ug ang rain cloud niini niabot sa Kabisay-an hinungdan sa mga pag-uwan sa kahapunon ug kagabhion nga molungtad pa og pila ka adlaw.
Dugang ni Tabada nga may posibilidad nga mahimo’ng bagyo ang LPA tungod kay sa Hulyo gibana-bana nga duha ngadto sa tulo ka bagyo ang mosulod sa Pilipinas hinuon gamay ra ang tsansa.
Gawas sa LPA, ang PAGASA wala pay nakita nga laing weather disturbance sa Pacific Ocean.
Gitataw ni Tabada nagpabilin gihapon ang El Niño ug gilauman nga mas ma-develop pa gikan sa moderate ngadto na sa strong El Niño ug base sa forecast sa PAGASA, posible sa mga mosunod nga mga buwan below normal gihapon ang uwan. Awhag sa ahensiya sa publiko nga magdaginot sa paggamit og tubig ug kun mahimo sawron ang tubig uwan aron dunay pundo alang sa umaabot nga ting-huwaw. -/GMR (BANAT NEWS)