CEBU, Philippines - Napuno sa pagsaway sa social media ang Talisay City District Hospital human nag-viral ang hulagway sa usa ka puya nga babaye nga nalubag ug milagom ang liog ug nakaingon sa iyang kamatayon human matud pa “gilubag-lubag” sa nagpaanak.
Ang nag-post sa Facebook giingong ig-agaw sa inahan sa puya diin usab gikuhaan sa Banat News sa maong impormasyon, walo ka oras human niini gi-post lakip ang litrato sa patay’ng lawas sa masuso.
Ang Banat News mitawag kang Dr. Agustin Agos, chief of hospital sa Talisay City District Hospital aron pagkuha og impormasyon bahin sa nag-viral nga hulagway diha sa social networking site, apan wala tubaga ang among tawag. Ang inahan sa masuso gikatahong nanganak niadtong Miyerkules base sa gi-post sa FB sa nangangkong ig-agaw sa inahan sa puya nga si Geralyn Topacio Gerasmio.
Base sa mga komento sa maong hulagway nga ang maong bata gipanganak diha sa nahisgutang tambalanan niadtong Miyerkules. Giingong ang bata suhi.
Apan gisaway sa iyaan ang tambalanan kay wala kini saktong kahimanan ug gibasol nganong wala dayon nila gipabalhin og laing tambalanan.
Sumala pa sa alegasyon, duha ka oras nga nagpinaabot ang inahan diha sa labor room una pa gibalhin sa Vicente Sotto Memorial Medical Center ang pasyente apan nag-ungot na sa pwerta sa inahan ang puya.
Apan pag-abot sa VSMMC, matud pa wala kaabti og singko minutos migawas ang puya apan patay na kini.
“Unsay pasabot? Gipraktisan nila og lubag-lubag ang bata?...unsa kasalbahis nga naing-ana kalagom ang liog ug nabali...nabali jud as in bali...nihilak ang midwife sa Sotto (VSMMC) ngano naing-ato ang bata,” mao kini ang tubag sa iyaan sa mga pangutana sa ilang mga kaila diha sa Facebook.
Sa laing bahin, ang provincial health officer, Dr. Cynthia Genosolango nagkanayon nga ang TCDH dili ubos sa pagdumala sa probinsiya tungod kay ubos kini sa Department of Health (DOH) apan manghipos sila og detalye kabahin sa maong insidente.
Ang hepe sa DOH, Dr. Jaime Bernades, nagkanayon nga wala pa sila’y nadawat nga report kabahin sa insidente apan ang ilang tambag sa mga tagtungod nga adto moduol kang Agos aron matubag ilang mga pangutana. - /EIM (BANAT NEWS)