Negosyante, dalaga gitulis
CEBU, Philippines – Mokabat sa P100,000 nga salapi uban sa mga alahas ang nahanaw gikan sa usa ka negosyante nga gikawatan sa upat ka tawo nga nagpatuo nga kustomer sa dalan Almirante, San Vicente, dakbayan sa Bogo alas 6 pasado kagahapon sa buntag.
Si Senior Police Officer 4 Reynaldo Rosaceña sa Bogo City Police Station niila sa biktima nga si Clarisa Akimoto, nanag-iya og tindahan ug kan-anan sa nahisgutang dapit.
Nag-ulhos sa paghidangat sa tindahan sa biktima ang upat ka lalaki nga nagsakay og Toyota nga awto nga kolor puti ug nagdunganay sa pag-order og sigarilyo, mineral water ug pagkaon hinungdan nga wala na nabantayi sa biktima ang iya’ng bag nga gisudlan sa mga alahas, kwarta ug mahalon nga tulo ka cellphone.
Una pa nabantayi sa biktima nga nahanaw na ang iya’ng shoulder bag diha’ng nakabiya na ang upat ka lalaki.
Samtang nawad-an sab sa iya’ng salapi ug mahalon nga mga butang ang usa ka babaye nga padulong na tambong sa trabaho diha’ng kalit lang gitulis sa armadong mga lalaki nga nagsakay og motorsiklo sa sitio Tabay, Canamocan, lungsod sa Compostela alas 5 pasado sa buntag sa niagi’ng adlaw.
Si Senior Police Officer 4 Pedro Enriquez sa Compostela Police Station niila sa biktima nga si Chuchelyn Calvaño, 23-anyos, dalaga nga nagpuyo sa mao’ng dapit.
Dili pa layo gikan sa ila’ng panimalay, kalit lang gihunungan ang biktima sa motorsiklo nga giluwanan sa duha ka lalaki ug ang backrider nga nanaug ang niduol sa biktima ug gitionan og armas dungan ang pagdeklarar nga tulis.
Nakuha ang salapi sa biktima nga P4,000, duha ka cellphone nga mokabat sa P14,000 ang kantidad ug dayung sibat pahilayo sa mga tulisan. – /GMR) (BANAT NEWS)
- Latest
