Magdasok na

CEBU, Philippines – Nagsugod na sa pagdagsa ang mga pasahero diha sa pantalan sa siyudad sa Sugbo aron mamauli sa mga silingang probinsya sama sa Bohol, Leyte, Ormoc, sa Mindanao bisan sa Manila sugod niadto pang adlaw’ng Domingo.

Sa samang higayon, gipaabot nga karong adlawa ilabi na sa hapon hangtud sa gabii, magdasok ang mga pasahero diha sa North Bus Terminal ug Cebu South Bus Terminal aron mamauli sa kalungsoran.

Gipanglantawan nga hangtud pa ugma (Huwebes) sa gabii magdasok og samot ang mga pasahero sa pantalan ug sa mga terminals sa Kabisay-an.

Daghang mga fastcrafts sa Weesam, Ocean Jet, SuperCat, ug sa 2GO Shipping lakip na ang mga dagkong barko ang nihimo og mga special trips padulong sa Ormoc, Tagbilaran, Tubigon, Leyte ug sa Mindanao.

Pasabot ni Claro Cagigas Jr., ang operations manager sa Pier 1 nga nag-triple ang gidaghanon sa mga pasahero karon. Matud pa niya wala na nagsubay sa ilang naandang schedules ang mga biyahe sa mga fastcrafts tungod sa kadaghan sa mga pasaherong kinahanglan ihatud.

Matud niya 30 minutos lang ang pahuway sa mga fastcrafts gikan sa pag-abot ug molarga na usab kini balik.

Nasayran nga karong Biyernes Santo, way mga barko nga mobiyahe hinungdan nga nag-apas ang mga tawo nga makasakay og sayo, apan mobalik sa normal ang mga biyahe sa adlaw’ng Sabado.

Gipahugtan usab ang seguridad sa terminals sa pantalan kay nagdugang sila og mga security guards, ug nitabang usab ang ubang ahensya sa gobiyerno sama sa Maritime Police, Port Police ug ang Philippine Coast Guard.

Aduna usab sila gipahimutang nga mga medical stations ug K9 Units pag-inspeksyon sa mga bagahe kun walay mga kontrabando.

Samtang niawhag sila sa mga shipping company nga dili una motugot og mga advance booking aron kalikayan kadtong mga mangingilad nga mopalit og daghang tickets apan ibaligya ra usab sa ubang mga pasahero sa mas mahal nga presyo.

Hangyo ni Cagigas ngadto sa mga pasahero nga patas-an pa ilang pailob aron way kagubot nga mahitabo.

Samtang nabantayan nga kasagaran sa mga namauli kagahapon nga nagpunsisok sa North Bus Terminal mga tinun-an sa kolehiyo ug mga bakasyonista, apan gipaabot nga 30 mil ka pasahero ang mangabot  sugod karong adlawa hangtud ugma tungod kay wala nay mga trabaho.

Aron dili magubot, first come-first served basis ang sistema nga ipatuman karon sa NBT ug wa nay priority numbers.

Ang Land Transportation Franchising and Regulatory Board-7 nagsugod na og inspeksyon sa mga prangkisa ug ubang dokumento sa mga bus ug sa mga drivers sa mga bus, lakip sa gitan-aw mao ang overloading alang sa kaluwasan sa mga pasahero.

Ang LTFRB nagbutang og help desk, ilabi na sa mga bus nga buot mokuha og special permits aron makabiyahe gawas sa ilang prangkisa.

Nagdugang og 30 ka mga buses ang Villacar Transit, hinungdan nga aduna na sila karon 150 ka mga buses nga mobiyahe  sa amihanang bahin sa Sugbo.

Aduna usab laing kapin sa usa ka gatus ka mga buses sa nagkalain-laing kompanya  nga mibiyahe.

Makita na usab sa mga terminal ang dugang polis ug mga gwardiya nga higpit nga nagdili sa bisan unsang matang sa mga hinagiban. – /EIM) (BANAT NEWS)