CCPO naalarma pagsuyop sa mga bata
CEBU, Philippines – Naalarma ang hepe sa City Intelligence Branch ug sa Women and Children Protection Desk sa Cebu City Police Office sa mga nasikop nga mga bata nga nanuyop og shabu sulod sa usa ka drug den sa Duljo-Fatima.
Si Superintendent Romeo Santander niingon nga mao pa siya nakakita og bata nga naaktohan nga nanuyop.
Ang mga bata niingon nga ila kadto gihimo aron molahutay sila sa pagpamaligya og newspaper gikan sa gabii hangtud sa gabii sa sunod adlaw.
Matud ni Santander nga kinahanglang maundang na ang drugas sa maong lugar aron wala na’y mga bata nga mamahimo’ng biktima.
Gihagit sa hepe sa CIB ang katawhan ug ang mga barangay opisyal sa maong lugar nga mohimo sa ilang trabaho ug mobarug aron pagsumpo sa mao’ng bisyo.
Moduso og report ang CIB ngadto sa Police Coordinating and Advisory Council (PCAC) aron isugyot nga butangan kanunay og mga polis ang Duljo-Fatima.
Samtang ang hepe sa WCPD sa CCPO, Inspector Arieza Otida, nibutyag nga ila na’ng naestorya ang mga inahan sa mga bata ug ang mga bata mismo.
Matud ni Otida duna gyu’y kaso nga mahimo nila’ng ipasaka batok sa mga ginikanan apan ila karong gitan-aw nga mosamot ang problema kun wala na’y makaatiman sa mga bata.
Gisubay na karon sa kapolisan kung kinsa’y tag-iya sa balay diin nasalbar ang mga bata aron pasakaan kini og kaso’ng child abuse gawas sa paglapas sa RA 9165. – /EIM) (BANAT NEWS)
- Latest
