Patay sa Balamban wa pa ilhi
CEBU, Philippines – Nagpabilin wala nailhi ang usa ka lalaki nga gituohang gi-salvage sa barangay Sunog, lungsod sa Balamban niadto’ng nakalabay’ng adlaw.
Matud ni Police Officer 1 Teofilo Verano, desk officer sa Balamban Police Station, nga nakit-an ang patay nga lawas sa bukiran ug kasagbutan nga bahin sa maong barangay.
Usa ka residente nga si Robert Lapinid ang nakadiskubre sa patay’ng lawas nga padulong na pagkadugta ug gibana-bana nga tulo ka adlaw na nga gipatay.
Nagsuot og kawo ang namatay nga may marka nga Handrick ug may numero 24 ang nakatatak sa likod. Nakasuot sab og yellowish nga sweat shirt, cargo short, itom ang bakus ug ang buckle duna’y marka nga Adidas.
Nakita sa kapolisan nga adunay igo pinusilan sa agtang ang lalaki.
Napahibawo na sab sa kapolisan sa Balamban ang mga silingan nga lungsod labot sa missing nga tawo sa ilang dapit.
Kasamtangan karon nga gipahiluna sa usa ka punerarya lungsod ang patay’ng lawas. – /GMR) (BANAT NEWS)
- Latest
