Tanker vs motor usa patay, usa angol

CEBU, Philippines – Usa ang patay samtang laing usa ang angol human masaghiri ang usa ka motor sa usa ka tanker truck sa barangay Calong-calong dakbayan sa Toledo kagahapon sa udto.

Giila ang namatay nga si Sheharrazad Fuertes taga Lawaan, sa  dakbayan sa Talisay samtang ang naangol si Nael Bucad  taga Corona del Mar,  Pooc sa dakbayan sa Talisay.

Ang duha sakay sa Yamaha Mio nga motor nga adunay plate number 7AT 175402.

Samtang ang drayber sa tanker nga adunay plate number 164MDO mao si Franciso Castro Embalsado lumad nga taga lungsod sa Carmen apan nagpuyo sa Guinsay, Danao City.

Matud ni Police Officer 3 Celso Makidato, imbestigador sa Toledo City traffic section nga ang mga biktima gikan nga nangaligo og dagat ug padulong na unta mopauli samtang ang tanker gikan sa barangay Pondol lungsod sa Balamban human nga naghatod sa karga nga lana ug paingon na untang mopauli sa dakbayan sa Sugbo.

Pag-abot sa nahisgutang lugar nasaghiran ang motor sa kasugat nga tanker ug maayong pagkalabay ni Fuertes kinsa angkas sa motor nga maoy nagrabehan.

Daling gidala sa Toledo City Hospital ang mga biktima apan gideklarar nga dead on arrival si Fuertes human nakaangkon og samad sa ulo ug sa paa.

Samtang gidala  og laing tambalanan sa dakbayan sa Sugbo si Bucad.

Ang drayber sa tanker gitanggong usab sa Toledo City detention cell alang sa pagpasaka kaniya og kaso. – /EIM) (BANAT NEWS)