Ginang gitulis sud sa iyang balay

CEBU, Philippines – Tulo ka mga tulisan ang misakiyo sa P150 mil nga kwarta ug mga alahas sa usa ka babayeng negosyante  diha sa Sitio Laray, Barangay Pitogo lungsod sa Consolacion.

Ang biktima nga midangop sa kapolisan giila nga si Marilou Hiyas, nagpuyo sa maong lugar.

Sa imbestigasyon sa kapulisan sa Consolacion nga gipangulohan ni Police Officer 3 Arthur Ariate ug mga kaubanan, gikan pa sa merkado ang biktima ug padung pa untang mosud sa ilaha dihang kalit nga nangabot ang mga tulisan.

Ang tulo ka armadong lalaki luwan sa usa ka XRM nga motorsiklo  ug diretsong mition og armas kaniya ug sa drayber sa habalhabal nga iyang gisakyan  ug pugsanon sila nga gipasulod sa balay sa biktima.

Didto  gibuwag sila og sud sa mga lawak ug gibantayan sa usa sa mga  tulisan samtang dunay usa nga nagbantay sa gawas ug ang usa maoy nangutingkay sa mga butang ug gipanguha ang kwarta ug mga alahas sa ginang.

Ang kapulisan nagduda nga posibling dugay na nga gisundan ug gipanid-an ang lihok sa negosyante sa mga tulisan kay unang gipangita sa mga tulisan ang giingong P500 mil nga pang-down payment ni Hiyas sa balay nga buot niining paliton.

Usa sa tulisan ang matud pa misumbag sa kutokuto sa biktima kay gusto g’yud niining makuha ang P500 mil.

Apan sa paglabay sa pipila ka minutos wa g’yud makita sa mga tulisan ang maong kwarta nga ilang gipangita hinungdan nga namiya sila sa maong balay.

Nadala hinuon sa mga tulisan ang P150,000, mga alahas nga kantidad P70,000 ug ang tulo ka yawe sa ilang sakyanan.

Gihulagway sa mga biktima nga anaa sa 5’6, 5’7 og 5’5 ang gitas-on sa mga tulisan nga nagsuot og jacket ug nagtaptap sa ilang mga nawong.

Hangtod karon nagpadayon pa ang gihimo nga imbestigasyon ug pagpangita sa kapulisan sa Consolacion sa mga tulisan. – /EIM) (BANAT NEWS)