3,000 niapil sa local WYD
CEBU, Philippines - Kapin sa 3,000 ka batan-on ang niapil sa ika-30 nga Local World Youth Day kagahapon sa University of Southern Philippines, Lahug, dakbayan sa Sugbo.
Si Marlito Cabigas, youth leader sa Cebu Diocesan Youth Coordinating Council, niingon nga mas daghan ang nitambong karon tuiga.
Matud ni Cabigas nga daku kaayo og impact ang kalihukan karong tuiga sa mga batan-on tungod kay gawas nga nagselebrar sila sa Peal Anniversary, nangandam usab sila sa International Eucharistic Congress sa sunod tuig.
Highlight sa kalihukan ang mga theme songs sa lain-lain nga LWYD ug ang Adoration sa Blessed Sacrament.
Nagsugod ang LWYD niadtong 1985 sa panahon ni Ricardo J. Cardinal Vidal nga maoy Arsobispo sa Sugbo pinaagi sa usa ka simple nga kasaulogan sa pagtapok-tapok sa 200 lang ka batan-on apan nilambo.
Sumala pa ni Edna Arellano sa Social Communications sa CDYCC nga gikalipay kaayo ni Vidal nga nakahibawo nga kapin sa 3,000 ang niapil karon.
Ang kalihukan nagsugod sa alas 8 sa buntag kagahapon ug natapos kini sa misa ni Arsobispo Jose Palma sa bendita sa lukay. (BANAT NEWS)
- Latest
