CEBU, Philippines - Nasikop sa mga sakop sa City Intelligence Branch (CIB) ang lima ka mga bata ug 11 ka tawo nga nanuyop og shabu sulod sa usa ka drug den sa barangay Duljo-Fatima sa dakbayan sa Sugbo.
Ang mga menor nga nasikop nag-edad og 9-anyos hangtod sa 14-anyos sulod sa usa ka kwarto sumala pa sa hepe sa CIB nga si Superintendent Romeo Santander.
Nasikop usab si Sally Mangolari, Beryl Loren Pane, ug Josefa Tabasa nga gidudahang caretaker sa drug den. Samtang ang mga hamtong nga nangadakpan usab nga gikatahong nanuyop naila nga silang, Jerry Ybañez, Roger Abellanosa, Julius Atillo, Velvic Tabasa, Christian Aguilos, Christian Bautista, ug si Aldwin Obejo, kasagarang mga drayber sa habalhabal.
Matud pa ni Santander nga ang maong drug den anaa lang duol sa barangay hall sa Duljo-Fatima nga usa sa mga barangay nga kusog ang pagpamaligya og drugas.
Nasikop ‘sab ang gituohang drug pusher nga si Janet Suarez Domin sa Sitio Ponyang sa Duljo-Fatima.
Nasakmit sa CIB ang 253 ka pakete nga shabu lakip na ang subject sa buy-bust operation nga gibana-bana nga mobalor og P80 mil.
Matud pa ni Santander nga nakurat siya nga mga bata pa kaayo ang mogamit og shabu niining mga panahona ug matud pa niya nga unang higayon kini nga nakadakop sila og mga bata nga manuyopay og shabu. Sumala pa ni Santander mga newsboys ang maong mga menor de edad.
“Ang ilang rason nga aron kuno dili sila dukaon mamaligya og newspaper sa kadalanan,” matud pa Santander.
Matud pa ni Santander nga human na-rescue ang mga bata gi-turnover ngadto ni Dr. Ester Concha, ang hepe sa Department of Social Welfare Services. (BANAT NEWS)