Lima ka pushers nangasikop
CEBU, Philippines - Duha ka gidudahang Level 3 drug pusher ug tulo nila ka batabata ang nadakpan sa kapolisan sa dakbayan sa Sugbo ug dakbayan sa Toledo.
Ang nadakpan mao sila si Dandie Jimenez, 45, alyas Edoy ug ang iyang “bata-bata” nga si Rey Resohinto, 24, diha madakpi sa Barangay Sambag II pinaagi sa mga sakop sa Cebu City Police Intelligence Division.
Sa Toledo nadakpan usab ang giingong Level 3 drug pusher nga si Mercy Gonzalez, 43, taga Barangay Climaco. Gawas kang Gonzalez, nadakpan usab sila si Emilio Torres, 27, ug Gabriel Gonzales, 24.
Matud ni Superintendent Romeo Santander, ang hepe sa Cebu City Intelligence Branch (CIB), ang target nga dakpon mao si Jimenez nga level 3 drug pusher diha sa Sambag II.
Apan atol sa buy-bust operation, diha si Resohinto ug sa iya nakuha ang P200 nga buy-bust money ug ang usa ka ampule sa Nubain.
Gidakop si Jimenez diha nga mibaligya kini’g gamay’ng pakete sa shabu kantidad og P200 ug nasakmita’g 26 ka gagmay nga pakete ug usa ka medium size nga adunay sulod nga gituohang shabu nga mokantidad og P66,800.
Gawas sa drugas, nakuha ‘sab sa mga polis ang upat ka ampules sa gituohang Nubain.
Samtang tulo usab ka suspetsado’ng pushers ang nadakpan sa dakbayan sa Toledo ug 58 ka gagmay nga pakete, tulo ka dagko nga pakete ug duha ka medium-size nga pakete sa shabu.
Gisuta pa sa kapolisan ang kinatibuk-ang kantidad sa nasakmit nga drugas. Dugay na nga gipanid-an sa kapolisan ang ilegal nga kalihukan sa mga dinakpan. (Jojo C. Ugdol ug Raymond Abarcas/RUB)(BANAT NEWS)
- Latest
