CEBU, Philippines - Hayan mano-mano ang pagpahigayun sa eleksiyon sunod tuig.
Kini nunot sa pagpugong sa Korte Suprema sa P268.8 milyones nga recalibration sa 82 mil ka Precinct Count Optical Scan (PCOS) machines nga gamiton unta sa 2016 nga eleksiyon gumikan kay wala’y bidding ang kontrata tali sa Commission on Elections ug Smartmatics.
Matud ni Provincial Election Officer Ferdinand Gujilde nga kinahanglang maresolbar dayun ang mao’ng isyu tungod kay makaapekto kini sa pagpangandam alang sa eleksiyon sa 2016. Kung dili masulbad ang maong isyu, posible’ng mobalik sa manual ang pagpahigayun sa eleksiyon, sumala pa ni Gujilde. Si Gujilde nagkanayun nga labing maayo ang automated election tungod kay paspas kompara sa manual.
Dugang ni Gujilde nga may pagduda nga dunay tikas ang automated election apan wala pa’y napamatud-an sa mga election protest nga sayop ang PCOS. (BANAT NEWS)