CIDG patabangon sa E-Bingo Robbery

CEBU, Philippines – Mga kopya sa footage sa CCTV camera sa mga suspek nga nanulis sa E-Bingo sa Mantawi Drive, Barangay Guizo siyudad sa Mandaue niadtong adlaw’ng Lunes dad-on sa Criminal Investigation and Detection Group-7 aron sa dugang pagsusi sa mga dagway sa mga tulisan.

Ang mga tulisan gikatahong nagduwa una og bingo sa wala pa sila modeklarar og tulis. Mokabat og P1.9 milyon ang nadala sa tulo ka mga tulisan sa maong bingohan sa adlawang dako.

Matud ni Senior Superintendent Petronelli Baldebrin, director sa Mandaue City Police Office, wala pa silay nakuha nga impormasyon labot sa identity sa mga tulisan.

Buot ni Baldebrin nga magpatabang sa CIDG-7 aron ma-enhance pa ang kuha sa footage aron maklaro ang dagway sa mga tulisan.

Nasayran nga wala gisalikway sa kapulisan ang posibilidad nga dunay inside job sa maong insidente tungod kay sigon pa ni Baldebrin  dunay mga gipanghimo ang mga empleyado nga makapaduda kaayo, wala hinuon siya modetalye pa niini.

Nagtuo si Baldebrin nga bag-o o dili taga Sugbo ang mga tulisan tungod kay wa man g’yud sila magtaptap sa ilang mga nawong. – /EIM) (BANAT NEWS)