Na-heat stroke patay
CEBU, Philippines – Naglagiting na ang kainit sa panahon nunot niining nasinating mild El Niño. Patay ang usa ka 57 anyos nga lalaki’ng collector gumikan sa kainit sa panahon kini gidudahang na “heat stroke” didto sa ma’y Jakosalem Street, Barangay Sto. Niño ning dakbayan sa Sugbo pasado alas 10 kagahapon sa buntag.
Ang namatay naila nga si Avelino Ocampo, nga taga Sitio Ubca, Barangay Quiot, Pardo ug collector sa ABCEB System Corporation.
Matud pa ni Police Officer 3 Dario Manatad sa Homicide Section sa Cebu City Police Office nga nahinabi sa Banat News, kini miingon nga daku ang posibilidad nga “heat stroke” ang namatyan ni Ocampo.
Ang mga sakop sa Emergency Medical Services (EMS) ang dali nga mitabang ni Ocampo apan nakabsan gayud kini sa iyang kinabuhi. Usa sa mga kauban sa trabaho ni Ocampo nga mibisita sa buhatan sa kapulisan nga si Edison Alferez, 32, mitug-an nga sa ilang buhatan pirme magpa-check sa “blood pressure” sa ilang mga kauban si Ocampo kay taas kini og dugo.
Miabot sa 32.1 degrees Celsius ang kainiton alas dos kagahapon nga natala sa PAGASA Mactan apan matud ni Al Quiblat, chief meteorologist sa PAGASA Mactan, ang aktwal nga nabatyagan sa lawas sa tawo o gitawag nga heat index miabot kini’g 36 degrees. Kagahapon sa udto, mas ubos ang kainiton sa 30.1 degrees Celsius apan ang heat index niini miabot og 34 degrees Celsius.
Dugang ni Quiblat dinhi sa Sugbo, ang Cebu City maoy nakasinati og grabeng kainiton tungod kay mas daghan ang tawo ug, daghang sementadong lugar apan gamay ang mga tanom.
Apan bisan pa sa kainit sa panahon, dili pa kini matawag nga summer season sumala pang Quiblat. – /EIM) (BANAT NEWS)
- Latest
