CEBU, Philippines – Kapin sa P1.4 milyones ang nasakiyo sa tulo ka armadong lalaki nga mitulis sa 8-E Binggo Club sa sulod sa City Time Square nga nahimutang 100 metros nga gilay-on sa buhatan sa Special Weapons and Tactics (SWAT) sa Barangay Subangdaku, Dakbayan sa Mandaue alas 2 pasado ang takna kagahapon sa hapon.
Si Police Officer 3 Arthur Cuyos sa Presinto 2 sa Mandaue City Police Office (MCPO) nga nakahinabi sa Banat News miingon nga ang tulo ka tulo ka lalaki nga nagdala og kalibre .45 pistola ug KG9 sub-machine pistols ang kalit nga misulod sa nahisgotang binggohan ug giduol ang cashier nga si Jezel Pelegrino, 28, nga taga Bacatan Compound sa Barangay Tipolo sa maong dakbayan.
Matud pa ni Cuyos nga dunay usa ka gwardiya ang binggohan apan atoa kini sa kantina ug dihang nibalik kini, nakasulod na ang mga tulisan ug gitionan usab kini og armas ug gipahapa.
Gikuha sa tulisan ang gibandol na daan nga kwarta ug gisulod sa bag ug pagkahuman yano kaayo nga migawas ug misakay sa motorsiklo nga gimaneho usab sa lain nilang kauban nga nagpaabot sa gawas nga maoy nagsilbing look out niini. Si Senior Inspector Zenaido Sanchez nga maoy hepe sa Investigation Detection and Management Bureau (IDMB) sa Mandaue City Police Office (MCPO) miingon nga nakakuha na sila og mga hulagway sa duha ka tulisan base sa video footage nga na-record sa Close Circuit Television (CCTV) camera.
Wa pay ideya ang kapolisan kun local robbery gang ang maong grupo. – /EIM) (BANAT NEWS)