Nagpalit og noodles gipusil, naninda tapsingan
CEBU, Philippines – Usa ang kritikal ug usa ang naangol atol sa pagpamusil nga nahitabo sa Espeleta St. Pahina-San Nicolas, dakbayan sa Sugbo pasado ala una sa nakalabay nga kadlawon.
Ang mga biktima naila nga sila si Bernard Wasawas Fernandez, hingkod, dunay kapuyo ug usa ka 13-anyos nga tinun-an sa Don Carlos A. Gothong Memorial School.
Sa imbestigasyon sa homicide section sa Cebu City Police Office, gitug-an ni PO1 Joel Zamora nga posible’ng igo lang gibaslan ang biktima sa iyang nakabikil. Si Zamora niingon nga dunay napusilan ang biktima niadto’ng Disyembre ug gani kini nasikop sa kapolisan.
Nasayran nga samtang nagpalit og noodles ang biktima sa usa ka tindahan kalit lang nitunga ang duha ka lalaki sa iya’ng likod ug ang usa armado og.45 caliber pistol ug dayun pusil sa makadaghan nga higayun.
Igo sa tangkugo ug dughan ang naangkon sa biktima samtang ang minor de edad nga naninda og noodles ang natapsingan sab sa iya’ng abaga.
Ang duha ka biktima dali nga gidala sa Cebu City Medical Center (CCMC) samtang gipangita ang suspek nga dali nga nisibat human sa krimen. – /GMR) (BANAT NEWS)
- Latest
