CEBU, Philippines – Ang makapanag-iya og kaugalingong panimalay ang usa sa mga labing gipangandoy sa usa ka pamilya. Apan bisan sa kalapad sa Pilipinas pipila lamang ang nagkaangkon niini.
Dinhi sa Sugbo makita nga daghang mga pamilya ang anha magpuyo sa daplin sa kalsada, ubos sa taytayan o sa mga squatters area gamit ang mga trapal, karton, kawayan ug uban pa.
Diha sa barangay sa Lorega–San Miguel ug Carreta dunay mga nagpuyo sa mga sam-ang niini, sama sa Carreta Public Cemetery, Doña Pepang Cemetery, Chinese Cemetery ug ang kanhi Lorega Cemetery nga gitukoran na karon og mga balay alang sa molupyo.
Ang ANCE o Action for Nurturing Children and Environment Incorporated, usa ka organisasyon nga ang adbokasiya mao ang pagtabang sa mga kabus, ilabi na sa mga pamilya nga wala’y kapuy-an.
Nalambigit usab sila sa pagpahigayon og klase sa mga batang nagpuyo sa mga sam-ang kansang mga ginikanan wa na makaatiman sa ilang panginahanglan sa pagtungha ug pagtabang sa mga pamilyang wa nay kapaingnan apan buot makalingkawas sa ilang kahimtang.
Ang ANCE nagsugod niadtong tuig 1982 nga gilangkuban sa mga grupo sa mga professionals nga buot mopaambit sa grasya nga ilang nadawat gikan sa Kahitas-an pinaagi sa mga charitable works pinaagi sa pagpahigayon og “seasonal feeding sa mga malnourished nga kabataan, pagpanghatag og gasa sa mga bata panahon sa Pasko ug school supplies sa mga kabus nga kabataan.
Apan hingpit kining nahimong legal nga grupo pinaagi sa Securities and Exchange Commission (SEC) niadtong tuig 2006, pinangulohan ni Fr. Maximo “Max” Abalos, SVD nga maoy ilang Executive Director.
Tungod sa wala’y saktong pundo nakig-alayon si Father Max sa mga organisasyon sa Germany nga may kasingkasing usab sa pagtabang sama sa Aktionsgruppe Kinder in NOT ug ang grupong Missio.
Agosto 2014, malampuson nga nakapatukod ang ANCE og 55 ka panimalay nga nagkantidad og P11 milyones para sa mga taga Lorega human sa dakong sunog niadtong Marso tuig 2014.
Si Ma. Theresa Villegas, usa sa mga nahatagan og libreng balay nga nahinabi sa Banat Tingusbawan mipasabot nga mapasalamaton siya sa ANCE tungod kay gitabangan sila sa iyang pamilya nga makatukod og kaugalingong panimalay.
Nitabang usab ang grupo sa pagpaeskuwela sa iyang mga anak ug ang pagtubo nila nga magpamilya sa espirituhanong bahin.
Apan gibutyag ni Rosemarie Dizon ang deputy director sa ANCE nga ang ‘pabahay’ nga proyekto wala kaayo hangopa sa pipila sa mga buot unta nilang tabangan.
Kini tungod kay ang uban gusto lamang nga makadawat apan dili buot nga mutabang sa uban pinaagi sa pagkahimong aktibong miyembro sa ANCE, paghunong sa mga bisyo ilabi na ang sugal, nga usa sa ilang mga rekisitos sa buot tabangan. Nagplano karon ang ANCE nga dugangan pa ang mga balay nga ilang gipahimo, plano na usab nila nga dugangan kini og laing 100 units condo nga mamahimong puy-an sa 57 ka pamilya sa taga Lorega, 20 ka pamilya nga gikan sa Carreta ug 20 ka pamilya nga nagpuyo sa Chinese Cemetery ug lain pang tulo ka units para sa ANCE coordinators nga nagkantidad og P50 milyones nga tukoron gihapon diha sa Lorega. Andam na ang kuwarta ug yuta alang niining maong proyekto apan dili pa kini nila mapatukod tungod kay daghang wa mouyon sa mga rekisitos sa grupo kay gihulagway kini nga mawad-a’g kagawasan ang tawo sa pagpili ug pagbuhat sa ilang gusto. Sa pagkakaron nanghinaot ang ANCE nga mahinayon ang maong proyekto tungod kay daghan ang nagkinahanglan niini. (BANAT NEWS)