Gipatay sa kapuyo

CEBU, Philippines – Gipatay, gilubong ug gisemento ilawom sa higdaanan sulod sa usa ka balay ang usa ka 27-anyos nga babaye diin suspek sa krimen ang iyang hinigugma nga usa ka ex-convict diha sa Barangay Pugalo, lungsod sa Alcoy.

Nadiskobrehan lang kini niadtong nakalabay nga buntag tungod sa grabeng pangalisbo sa baho kay wala matarong og semento ang gilubngan sa biktimang si Ma. Lovely Fajardo. Ang suspek mao ang iyang kapuyo nga si Ernesto Gamboa, alyas Etor.

Matud pa ni Police Officer 1 Juanito Asenjo ang desk officer sa Alcoy Police Station nga nahinabi sa Banat News, usa ka konsehal sa maong barangay nga si Ronilo Debulosan maoy mitaho sa ilang buhatan gumikan sa reklamo sa mga residente sa dili masingo nga baho gikan sa balay sa duha.

Sumala pa ni Asenjo nga atol sa pagsubay sa kapulisan sulod sa balay ilang nadiskobrehan nga duna’y gisemento ilawom sa higdaanan, wala diha ang duha.

Apan tungod sa pagduda, ilang gidugkal ang bag-ohay pang gisementong salog apan ilang nakita ang patay nga lawas ni Fajardo nga igo lang gilubong og tulo ka tiil sa yuta ug gibuhosan og minasang semento.

“Ang lawas sa tawo basta mamatay moburot man g’yud na, mao ‘to kay mabaw ra man ang pagkalubong natipak ang semento pagburot sa lawas, mao nga migawas ang baho,” matud pa ni Asenjo.

Sigun pa ni Asenjo nga bag-o lang nagpuyo ang duha sa maong lugar. Ang kapulisan sa Alcoy nagduda nga giluba sa suspetsado ang biktima human nila narekober ang usa ka kutsilyo nga 15 pulgadas sa crime scene ug dunay nakitang samad sa kilid ang namatay.

Apan si Asenjo miingon nga nagpaabot pa sila sa pinal nga report sa gihimo nga autopsy sa lawas sa biktima kay anaa na kini sa “state of decomposition.” Gituohan nga tulo hangtod upat ka adlaw na kining gipatay.

Ang desk officer sa Dalaguete Police Station nga si SPO1 Peter Isidro nga nahinabi sa Banat News mibutyag nga dunay kasong parricide si Gamboa kaniadto sa Dalaguete tungod sa pagpatay sa iyang asawa. Wala sila nasayod kun nganong nakagawas kini sa prisohan. – /EIM) (BANAT NEWS)