Manghud napusilan sa maguwang
CEBU, Philippines - Grabe’ng naangol ang manghud nga gipusil sa maguwang sa sitio Tiwasan, Catarman, Liloan alas 8 pasado ang takna sa niaging gabii.
Si Police Officer 3 Jesson Gayo niila sa biktima nga si Ferdinand Barrios, 44, ug ang suspek mao si Cesar Barrios, 45, wala’y trabaho ug nagpuyo sa maong dapit.
Ang laing igsuon nga si Alley Barrios, 43, nga habal-habal driver ang nitaho sa kapolisan human sa hitabo.
Sumala sa gitug-an ni Alley nga napusilan sa ila’ng maguwang ang biktima nga wala’y igo’ng hinungdan tungod kay wala sila kamatikod sa duha nga nag-away.
Si Ferdinand nakaangkon og duha ka samad pinusilan sa iyang tiyan nga hinungdan nga dali’ng gihatud sa tambalanan.
Wala na naabti sa kapolisan ang suspek kinsa sumala pa sa mga silingan dali nga nakasibat pahilayo sa mao’ng dapit. (BANAT NEWS)
- Latest
