CEBU, Philippines - Gusto sa caretaker sa Talisay City College, Dr. Edgar Martinez, nga usbon ang komposisyon sa kasamtangan nga Board of Trustees. Matud ni Martinez nga adunay lagda ang Commission on Higher Education ubos sa CMO Memorandum Circular No. 32 series of 2006 nga han-ay sa komposisyon sa BOT.
Kini gilangkuban sa mayor isip chairman, college president isip vice chairman, presidente sa faculty association isip board secretary, presidente sa Supreme Student Government/Council, presidente sa Alumni Association, chairman sangguniang committee on education, representante sa CHED, Local Colleges and Universities, Senior Citizens Federation, community with high academy background isip ex-officio member- consultant ug City Legal Officer isip ex-officio member-consultant.
Matud ni Martinez nga ang komposisyon sa BOT wala mapatuman ug gani ang ubang sakop dili aktibo.
Ang TCC gitukod niadto’ng 2004 ug naumol ang BOT sa 2005 ubos sa usa ka ordinansa.
Nitumaw ang kontrobersiya diha’ng gi-usab ang ordinansa niadto’ng May 21, 2013 human nidaug si Mayor Johnny delos Reyes nga mao’y gihatagan og appointing authority sa pagtudlo og presidente ug mga sakop sa BOT sa TCC.
Gipahibawo ni City Legal Officer Alfredo Sipalay nga may ordinansahon si Konsehal Valeriano Ylanan sa pagpatuman sa CMO apan wala pa napasar hinungdan nga wala pa naklaro kinsa ang presidente sa TCC ug wala masubay sa lagda ang pagtudlo sa mga sakop sa BOT.
Pagkakaron ang mayor ang acting president sa TCC ug si Martinez ang caretaker samtang nagpaabot nga mapasar ang ordinansahon ni Ylanan. (Renan R. Alangilan/GMR)(BANAT NEWS)