Kay dunay mopatay, naghikog
CEBU, Philippines - Patay ang usa ka lalaki human kini nagpusil sa iyang kaugalingon gamit ang pugakhang tumong sa iyang dughan diha sa Barangay Kanghalo lungsod sa Dumanjug sa miaging adlaw.
Ang nagpakamatay naila nga si Alfredo Lada, 30, minyo ug nagpuyo sa maong lugar.
Matud pa ni Police Officer 3 Dionesio Tagopa ang imbestigador sa Dumanjug Police nga nahinabi sa Banat News nga ang mga kabanay miingon nga duna’y gihambin nga “nervous breakdown” ang maong lalaki.
Ang inahan sa naghikog nga si Antonia ,52, miingon nga niadtong adlaw nga Domingo nauli ang iyang anak gikan sa dakbayan sa Sugbo diin kini nagtrabaho isip tighimo og longanisa.
Matud niya, nabantayan niya nga lahi na kaayo ang iyang panglihok g nagsige og sulti nga dunay mopatay kaniya.
Gani matud pa niadtong nakalabay nga gabii nagdala og sanggot ug gidulog kini ni Alfredo sa pagkatulog, apan ilaha kini gikuha human gialam-alaman.
Apan nianang pagkasunod buntag, mao na lay ilang nadungog ang buto sa armas ug sa ilang pagsusi sa lawak ni Alfredo nagkadugo na kini sa dughan ug namatay.
Nakuha sa kapulisan sa crime scene ang usa ka basiyo sa bala sa shotgun ug ang usa ka pugakhang. Sa pagsubay sa kapulisan wala sab sila’y nakitang foul play sa maong hitabo. (Jojo C. Ugdol/EIM)(BANAT NEWS)
- Latest
