CEBU, Philippines - Gipangita karon sa mga sakop sa Talisay City Police Station ang mga bata nga saksi sa kasong arson nga gipasaka nila batok ni Mayor Johnny de los Reyes human nga nahanaw sila sukad pa niadtong Lunes human sa insidente.
Matud ni Superintendent Reycel Carmelo Dayon, hepe sa Talisay nga ang maong mga bata pirmeng mosuroy sa buhatan sa kapolisan aron motan-aw og salida sa telebisyon.
Apan wala na nila sila makit-i niadtong Lunes sumad niadtong insidente sa pagkasunog sa mini dump truck.
Apan nakadawat sila og impormasyon gikan sa Talisay City Hall nga nag-ingon nga ang maong mga bata naa na sa kustodiya sa Department of Social Welfare and Development 7.
Tungod niini, ilaha kining gisubay apan nasuta nga wala sa Parian Drop-in Center sa Cebu City ug sa Department of Social Welfare Services sa Talisay City ang mga bata nga maoy gitug-an sa kampo sa mayor.
Sumala pa niya nga sa pagkawala sa duha ka bata nawagtangan na sila og mga testigos nga makahatag unta og katin-awan kun unsay nahitabo niadtong adlawa.
Apan matud pa niya padayon nilang pangitaon ang mga bata ug ang pag build-up sa kaso nga arson batok sa mayor. (Bryner L. Diaz/EIM)(BANAT NEWS)