CEBU, Philippines - Multa ngadto na sa pagkanselar sa business permit ang posibleng ipahamtang nga silot sa mga dinakpan nga nagpalusot ug buot mobaligya og mga assorted "hot meat" diha sa Lagtang Public Market sa dakbayan sa Talisay.
Sumala pa nga gisakmit sa mga otoridad ang mga karne sa baboy, baka ug kanding gikan sa tindahan ni Johnny Sarsonas.
Ang Talisay meat task force nga gipangulohan ni City Veterinarian Dr. Santiago Hortel maoy nisakmit sa maong mga karne nga matud pa nagsugod na og baho ug gihulagway nga dili na angay kaunon sa tawo.
Gisud ang maong mga karne sa mga ice cases sa usa ka bodega sa maong merkado nga dakong kalapasan sa hustong pagdala ug paghipos og mga karne.
Sumala pa ni Hortel, walo lang ka oras luwas kan-on ang karne gikan sa pag-ihaw niini ilabi na kun kini mahanginan ug tugpahan og mga langaw.
Ang karne kinahanglang hipuson sa refrigerators aron dili kini daling marantso ug puy-an og kagaw subay sa balaod. Giawhag ni Hortel ang publiko nga sigurohon g’yud nga luwas ug dunay sanitary meat inspection ang mga karneng ilang mapalit. (BANAT NEWS)