Taxi operators pabutangon og paskin
CEBU, Philippines – Gimando sa Land Transportation Franchising and Regulatory Board-7 sa mga taxi operators nga moprinta og kaugalingon nilang paskin nga nag-ingong P10 ang i-refund sa pleti sa pasahero.
“Akong requests sa mga taxi operators isip tabang sa LTFRB nga sila na lang ang moprinta sa mga signage kay ang gi allocate diri sa amoa is only 500 ka mga stickers,” matud pang LTFRB-7 regional director Rey Elnar. Sumala pa ni Elnar, dinhi lang sa Sugbo, duna nay 5,000 taxi units nga nagdagan.
Wa hinuoy sundon nga standard size sa ipa-printa kanilang stickers basta aduna lang g’yud mabutang nga paskin aron makahibalo ang mga pasahero.
Miapelar hinuon si Elnar sa mga drayber nga awtomatikong kuhaan og P10 ang pleti sa mga pasahero bisan dili sila mangayo niini tungod hangtud karon duna gihapoy mga pasaherong wala masayod sa P10 nga diskuwento.
Ang P10 nga provisional P10 fare discount gipatuman sa tibuok nasud sugod niadtong Marso 9, 2015.
Sukad nga kini gipatuman, siyam na ka mga drayber sa taksi ang gireklamo tungod sa wala nila pagsanong sa kamandoan. Walo kanila ang gipatawag karong adlawa aron paesplikaron.
Samtang ang usa nga si Jose Ramos kinsa gireklamong nanion og kutsilyo sa iyang pasahero nga si Dave Horca sugdan ang hearing karong adlaw nga Huwebes. Si Ramos daan nang mihimakak sa mga pasangil nganha kaniya. (Edwin Ian Melecio gikan sa The Freeman)
- Latest
