Mga payag duol sa LTO gireklamo

CEBU, Philippines – Gireklamo sa buhatan sa Office of Building Official (OBO) sa dakbayan sa Mandaue sa mga nagpakabanang  lumolupyo ang pagpanukod og mga payagpayag sa luna nga gipanag-iya sa nasudnong kagamhanan sa Barangay Subangdaku.

Ang mipadangat og reklamo mao sila si Dr. Danilo Dionson nga taga Barangay Looc sa maong dakbayan ug Jovert Nemenzo nga maoy chairman sa National Alliance Confederation of Tricycle Operator and Drivers sa Association of the Philippines (NACTODA) sa Mandaue City Chapter.

Gipadangat nila ang ilang reklamo sa miaging semana ngadto sa buhatan ni Engineer Dario Mago nga maoy officer-in-charge sa City Engineering office sa maong dakbayan.

Si Dionson nga nahinabi sa Banat News miingon nga sa ilang pakisusi ang maong mga payagpayag wa mananghid sa National Telecommunications Commission (NTC) pagtukod niini. Ang maong luna kasikbit lang sa Motor Vehicle Inspection Service (MVIS) ug kining maong mga payagpayag giingong gamitong opisina sa mga nagkalainlaing klinika ug drug testing clinics.

Gipasabot nila nga kun kini pasagdan mahimo na usab kining suliran sa kagamhanan sa umaabot nga panahon.

Ang maong mga payagpayag gipangtukod human nabalhin ang buhatan sa LTO district office gikan sa Barangay Looc sa nahisgotang dapit. – /EIM) (BANAT NEWS)