CEBU, Philippines — Atol sa pagsaulog sa Women’s month karong tuiga, ang Police Regional Office (PRO) 7 mopahigayon sa ila’ng ikaduha nga indigay sa paanyagay sa ilang mga babayeng polis.
Kini himuon aron makita usab ang “feminine side” sa mga babayeng polis bisan pa og giisip nga trabaho sa lalaki ang ilang propesyon.
“Looking at the other side sa atong mga policewomen, ipakita nato nga daghan pu’ng gwapa nga mga police officers nato”, sigon ni Inspector Arieza Otida.
Karong tuiga, duha ka mga policewomen ang morepresentar sa ilang tagsatagsa ka police units, apil usab niini kadtong nasakop sa Lesbian, Gay, Bisexual and Transgender (LGBT) nga maoy mopares sa mga policewomen.
“Last year, solely females lang g’yud siya but I suggested nga much better siguro if tagaan pud nato og importansiya kinin’g mga LGBT’s nato especially right now nga accepted na sila sa society nato,” pasabot ni Otida.
Ang mga contestants sa Police Fashionista magpanindotay sa hustong pagdala sa ilang mga uniporme. Aduna say gown competition ug formal wear para sa mga LGBTs.
Ang mananaog aduna’y premyo nga kwarta, trophy ug korona.
Ang Police Fashionista 2015 ipahigayon karo’ng umaabot nga Marso 18, alas 6:00 sa gabii sa PRO-7 grounds. (BANAT NEWS)