M.Logarta St. himuong two-way sa hapon

CEBU, Philippines - Himuon pag-usab nga two-way ang dalan M. Logarta Avenue sa Barangay Subangdaku, Dakbayan sa Mandaue  matag alas- 5 sa hapon hangtod sa alas- 7 sa gabii aron maluag-luag ang problema sa trapiko sa maong dapit.

Ang maong dalan nagsumpay sa Cebu City ug Mandaue City nga nakasinati karon og problema tungod sa road repairs sa S.Osmeña Avenue.

Si Edwin Ermac, pangulo sa Traffic Enforcement Agency of Mandaue (TEAM), miingon nga gihimo kini tungod sa hangyo sa Cebu City.

Sa maong dalan usab moagi ang dagkong truck nga gikan sa pier area padung ug balik sa Cebu City ug Mandaue City.

Kahinumdoman nga sila si Mayor Michael Rama ug Mayor Jonas Cortes nagtagbo sayo ning semanaha aron sulbaron ang problema sa trapiko sa maong dapit. (Romeo T. Limpangog/EIM)(BANAT NEWS)