CEBU, Philippines – Grabe’ng naangol ang construction worker nga kalit lang gipusil sa armado’ng mga lalaki samtang namasol sa Suba, barangay Poblacion, lungsod sa Liloan alas 11 pasado ang takna sa niagi’ng Lunes sa gabii.
Si Police Officer 3 Jesson Gayo sa Liloan Police Station niila sa biktima nga si Ferdinand Ramos, 33, nga nagtrabaho isip mason sa usa ka construction firm sa nahisgutang lungsod.
Matud ni Gayo nga nalingaw unta kaayo ang biktima tungod kay kusog ang pagkubit sa isda sa iya’ng pagpamasol apan wala lang damha nga gihunungan kini og motorsiklo nga giluwanan sa duha ka wala hiilhi’ng lalaki ug gipusil.
Naigo sa iya’ng tuo’ng paa ang biktima sa una’ng pagpusil ug gisundan pa sa makadaghan nga nakaaghat na lang sa pag-ambak ngadto sa suba ug nisawom pidpid sa daplin sa pangpang.
Gipasundan pa sa daghang pagpusil ang biktima apan wala na maigo tungod kay nakapahipi na sa daplin sa pangpang.
Human nakapalayo ang mga suspek, nigawas ug nangayo’g panabang sa kapolisan ang biktima kinsa gihatud sa tambalanan. – /GMR) (BANAT NEWS)