Dunay overcharging

CEBU, Philippines – Giawhag sa Land Transportation Franchising and Regulatory Board-7 ang mga sumasakay nga isumbong ang mga drayber sa taksi kun dili motuman sa bag-ong flagdown rate nga P30.

Sugod kagahapong adlawa gipaubsan og P10 ang flagdown rate sa taksi gikan sa P40 nahimo na lang kining P30. Matag 300 metros P3.50 gihapon ang patak niini.

Matud pa ni LTFRB-7 regional director Rey Elnar  dunay usa ka pasahero nga mireklamo batok sa usa ka taxi driver nga wala motuman sa bag-ong pletihan kagahapon.

"Naa usa ka pasahero ni report kay wa gikuhaan og P10.00 ang plete," matud pang Elnar.

Tungod sa reklamo, ang operator ug ang maong drayber gipatawag ni Elnar  aron matubag ang reklamo sa pasahero.

Sumala pa ni Elnar kun mapamatud-ang nag-overcharging ang maong drayber pamultahon ang drayber og P1,000 samtang P5,000 ang multa sa operator.

"So far, ang mga drivers okay ra man. Wa man sad sila’y mahimo kay kung di sila motuman, dako man ang penalty," dugang pa ni Elnar.

Kagahapon nagsugod na ang LTFRB-7 pagpamilit og stickers sa dashboards sa mga taxicabs nga nagpahibalo sa sumasakay  bahin sa P10 fare reduction.

Lakip sa gipaubsan ang pletihan mao ang mga yellow taxicabs nga nagbiyahi gikan sa tugpahanan sa Mactan.

Si Jimlan Tabanao, 47, taga Mandaue City ug drayber sa Mark Noreem Taxi mipasabot nga supak siya sa fare reduction tungod kay nimahal og balik ang presyo sa petrolyo.

“Dili jud ko uyon ani, pero kay wala man koy mahimo mao man ang mando maong  motuman na lang jud ta.” Apan si Ricardo Demon, 40, nga drayber usab sa Richielda Taxi miingon nga uyon ra siya sa fare reduction tungod kay mosakay man usab siya og taksi sa iyang pagpauli human siya mogarahe. – /EIM) (BANAT NEWS)