CEBU, Philippines- Taliabot na ang summer vacation, gipaabot usab nga moinit ang panahon. Ang lawas sa tawo nagkinahanglan og fluids mao nga ang mga eksperto sa Department of Health miingon nga kinahanglang dili maughan ang lawas aron dili makasinati og heatstroke ug moresulta pa hinuon sa kamatayon.
Daghang mga pangpabugnaw nga kapilian, dunay uban nga wala kaayo mailhi ang mga sagol, apan duna say daghang nailhan na kaayo nga gawas nga lamian sustansyado pa kaayo! Usa na niini ang fresh pineapple juice nga mapalit og P5 ngadto sa P10 matag baso (depende sa gidak-on).
Unang nakahinabi sa Banat Tingusbawan si Ernesto Cinabre nga taga Pasil, Cebu City, ug bisan pa sa iyang pangidaron nga 62-anyos, wa kini paglubad sa pagbaligya og fresh pineapple juice sa kadalanan sa Carbon Public Market.
Matud pa niya tuig 1986 pa lamang siya nagsugod niini sa gamay nga pwesto duol sa ilang balay, apan karon, maglibot na siya sa mga kadalanan sakay sa usa ka bike nga duna’y “improvised sidecar.”
Mao kini ang gibuhi niya sa iyang pamilya ug pagpaeskuyla sa pito niya ka mga apo nga anaa nagpuyo kanila sa iyang asawa. Ang duha niini graduating na sa high school samtang ang upat pulos naa pa sa elementarya.
Mopuhonan siya og P500 alang sa nilata nga pineapple juice, asukar ug duha ka gallon sa refillable mineral water ug disposable cups.
Sigon pa niya makaduha ka higayon siya magtimpla niini matag adlaw. Kada timpla niya diin mapuno ang iyang “tangke” (stainless tank).
Kun kini mahurot, moginansya siya og P800 matag tangke. Ang matag adlaw nga P1,600 nga kitaon maoy ilang gamiton sa ilang pang-adlaw-adlaw nga panginahanglan.
Lain usab nga namaligya og fresh pineapple juice mao si Reynold Dayota, 24-anyos, taga Barangay Ermita, Cebu City. Sama ni Ernesto, mao kini iyang gibuhi sa iyang pamilya. Magduha pa lamang ang ilang anak sa iyang asawa.
Nagsugod siya niining iyang negosyo niadtong tuig 2004 sa nag- edad pa lamang siya’g 13-anyos tungod kay mao kini ang iyang namat-an gikan sa iyang mga ginikanan.
Ang iyang produkto kaparehas ra ni Ernesto apan ang kalainan lamang mao ang iyang kitaon tungod kay dili man niya pun-on ang iyang tangke.
Matud pa niya matag adlaw, mopuhonan siya’g P600. Ini’g abot sa hapon ug kun mahurot na iyang ikaduha nga “tangke” motubo siya og P350 ngadto sa P400.
Nakasabot si Reynold kun unsa kamahinungdanon sa usa ka tawo ang mokita matag adlaw tungod kay wa may libre karon.
Ang mga kaparehas nila nga naninda diha sa mga sidewalks dako na kaayong tabang sa mga tawo nga way ikasarang pagsulod sa mga mahalong fastfood chains aron makainom og bugnaw.
Sa P5 mawagtang na ang kauhaw ilabi na karong panahon na sa ting-init. (BANAT NEWS)