CEBU, Philippines- Nadakpan sa mga barangay tanod ug mga istambay ang suspek sa pagpanulis og taxi diha’ng nakiglayog ang drayber ug nailog ang kutsilyo.
Ang pagpanulis nahitabo sa dalan M. Logarta, Subangdaku, dakbayan sa Mandaue alas 2 pasado ang takna sa niagi’ng kadlawon.
Si Police Officer 2 Fredelou Quezon sa Presinto 2 sa Mandaue City Police Office (MCPO) niila sa dinakpan nga si Richard Singson, 34, taga Sitio Sam-ang, Magdugo, dakbayan sa Toledo.
Matud ni Quezon nga ang biktima nga si Nilo Ypil, 64, taga Maguikay, dakbayan sa Mandaue ug drayber sa Evolution Taxi nga nagdala sa plate number GXE 817 gikan sa dakbayan sa Sugbo ug ang suspek nagpahatud sa North Bus Terminal.
Diha’ng nahidangat na duol sa maong dapit kalit lang nition og kutsilyo sa iyang likod ang suspek ug nideklarar nga tulis ug gipangayo ang kinitaan sa biktima.
Gigunitan sa biktima ang bukton sa suspek dungan ang paglubag nga nakaingon sa ilang panagkarambola hangtud nalupig sa kusog ang suspek ug nailog sa biktima ang kutsilyo.
Nagdali paggawas ug nidagan palayo ang suspek apan ang mga istambay nga nakadungog sa pagpangayo og tabang sa biktima ang dali nga nakasugat ug gikulata ang suspek.
Ang mga barangay tanod sa Subangdaku nga sila si Vicente “Inting” Cabalquinto ug Allan Pitogo nga naagi sa ila’ng pagpatrolya ang niresponde ug gidakop ang suspek.
Ang biktima naka-angkon og samad sa bukton ug ang suspek nabulit sa daghang bun-og sa kalawasan ug gidala sa Mandaue City Hospital. (BANAT NEWS)