CEBU, Philippines - Gidunggab sa 34-anyos nga babaye ang iyang kapuyo gawas sa usa ka videoke bar sa Gun-ob, dakbayan sa Lapu-Lapu ala una sa kadlawon niadto’ng Biyernes.
Matud ni Police Officer 2 Joseph Rouel Cutanda sa Lapu-Lapu City Police Office nga nakaangkon og samad dinunggaban sa wala nga bahin sa tiyan si Brian Bahian, 27, human nakiglalis sa iya’ng kapuyo nga si Genivive Navarro.
Ang duha pulos stay-in worker sa Magdalena Videoke Bar nga nahimutang sa Maximo Patalinghug Avenue sa maong lugar.
Giingong nakig-inom si Navarro ug Bahian sa ila’ng mga higala sa maong bar ug nahitabo ang panag-away nga nisangko sa selos.
Matud ni Cutanda nga una’ng nigawas si Navarro sa videoke bar ug nisunod si Bahian ug nahitabo na sab ang panaglalis.
Matud sa usa ka saksi nga una’ng nakadawat og sakit nga estorya si Navarro gikan ni Bahian hinungdan nga gidunggab sa suspek ang iya’ng kapuyo gamit ang hait nga hinagiban. Dali’ng nidagan palayo ang suspek samtang gidala sa Lapu-Lapu City Hospital si Bahian. (BANAT NEWS)