CEBU, Philippines - Gibutyag ni Secretary Joel Villanueva nga ang Technical Education and Skills Development Authority motabang sa pamilya sa nangamatay nga 44 ka sakop sa PNP-Special Action Force sa Mamasapano, Maguindanao.
Matud ni Villanueva nga nitanyag sila og mga proyeto lakip na sa scholarship program sa nabiyaan nga pamilya sa duha ka Sugbuanon nga sila si PO1 Windel Candano ug PO1 Romeo Cempron.
Diha’ng gipangutana si Villanueva kun may tulubagon ba si Presidente Benigno Aquino III sa nahitabo sa Mamasapano, wala kini’y direktang tubag apan niingon nga base sa iyang nadungog tataw kaayo ang kakuwang sa koordinasyon.
Supak si Villanueva sa panawagan sa kadaghanan nga pakanaugon si Aquino sa katungdanan.
Labot sa Bangsamoro Basic Law, si Villanueva nagtuo nga ang habig sa kagamhanan lakip na sa Moro Islamic Liberation Front nasayud nga dunay angay usbon sa maong balaudnon.
Si Villanueva nibisita sa Sugbo aron pagtambong sa Fun Run karong Sabado uban ang mga scholars ug supporters sa TechVoc sa TESDA. (BANAT NEWS)