Laing duha ka CH employees adik

CEBU, Philippines - Naalarma na karon ang pangulo sa Cebu Office for Substance Abuse Prevention human laing duha ka trabahante sa kagamhanan sa dakbayan sa Sugbo ang nagpositibo sa paggamit og ilegal nga drugas. Si Dr. Alice Utlang miingon nga naalarma siya tungod kay napulo na ka kawani ang nasakpang tiggamitan og drugas sugod sa Enero hangtod sa Marso ning tuiga mas daghan kini itandi sa miaging tuig nga nakatala lamang og kinse sa tibuok tuig 2014.

Sigon ni Utlang nga 9 ka trabahante niini ang mga casual ug ang usa ang regular. Duha na sa napulo ka trabahante ang nangataktak sa serbisyo human nagpositibo.

 Naduso na sa City Legal Office ug Human Resource and Development Office (HRDO) ang resulta sa drug test alang sa tukmang lakang nga buhaton niini.

Apan, sa habig ni Mayor Michael Rama, ang napulo ka mga nagpositibo dili makaalarma. Matud sa mayor nga kinahanglan pa og comparative analysis ang drug test operation sa COSAP aron mahibaw-an nga misaka ang number of drug users or mikunhod kini.

Apan gusto sa mayor nga mataktak ang tanang mga trabahante nga nagpositibo. (BANAT NEWS)