CEBU, Philippines - Patay na nga nakaplagan ang usa ka babaye nga may kakulian sa pangisip nga gituohang nalumos human kini niambak sa taytayan sa Kinawahan, Lungsod sa San Remegio.
Si Senior Police Officer 2 Jovannie Pacencia sa San Remegio Police Station miila sa namatay nga mao si Narcisa Monterola Veraque, 52, taga Barangay Tacot sa nahisgotang lungsod.
Usa ka Jerry Coma maoy nagpahibalo sa kapolisan labot sa usa ka babaye nga napalgang naglutaw sa nahisgotang dapit.
Nasuta nga dunay nakakita sa maong babaye nga milayat sa taytayan pasado alas-5 sa hapon ug naglangoy-langoy pa kini hinungdan nga nagtuo ang mga tawo nga igo ra kining naligo.
Nagtuo ang kapolisan nga pagkalumos ang hinungdan sa kamatayon sa maong babaye.
Samtang usa ka 17-anyos nga lalaki ang misulay unta sa paghikog pinaagi sa pag-ambak sa skywalk sa Sitio Hill Top, Barangay Casili, Consolacion.
Ang 17 anyos gikatahong nipatong na sa railings dihang nabantayan sa mga tawo ug kini gibadlong dungan sa pagpangayo og police assistance.
Ang mga polis maoy mialam-alam kaniya hangtud nga kini nakombinsir ug mikuyog sa presinto. Ang amahan niini mao nay miapas kaniya ug gidala kini sa ila.
Wa matino sa kapolisan kun unsay motibo niya kun nganong misuway kini sa paghikog. (BANAT NEWS)